
Edith Albin
Edith Albin, oriunda dad Aachen, ei agronoma e formatura da carschi e viva gia dapi 20 onns en Surselva.
Ella ei vegnida sco signuna sin in'alp en Lumnezia. Ussa meina ella ensemen cun siu um e quater affons in menaschi puril biologic a Tersnaus (www.biohofalbin.ch).
Edith Albin ei fetg interessada da tut quei che la regiun alpina porscha: cultura, lungatg, historia, la natira alpestra, alpicultura, velo da muntogna, viandar ed il s'entupar dil vegl ed il niev en quei ambient.
Ella ha sviluppau ils luvratoris “Spassegiada alpestra” e “Schuobacheclers.

Claudia Bosshard
Claudia Bosshard ei mumma da treis affons e habitescha cun sia famiglia dapi tschun onns a Morissen. L'encarschadetgna per ils cuolms ha menau ella a Morissen, nua ch'ella gauda siu temps liber il pli bugen ora ella natira cun far bialas spassegiadas. Claudia ha biars interess. Bugen sefatschenta ella cun la natira, ils animals, las jarvas, l'economia d'alp e l'agricultura.
El Museum Regiunal meina Claudia ils luvratoris „Paun sur burnida“ ed "Ils schuobacheclers".

Petra Cavelti
Petra Cavelti ei mumma da treis affons e viva cun siu um e famiglia en siu vitg natal Sagogn. Sco commembra activa en differentas uniuns s’interessescha ella fetg per la veta en sia vischnaunca. Dalla generaziun veglia ha ella empriu il far paun el „pistrin“, sco ils da Sagogn numnan lur pistregn. Ord finiastra cuschina, nua ch’ella emprova bugen ora novs rezepts da pauns e petas, ha ella bien en egl il pistregn renovau davos la casa parvenda catolica da Sagogn. Leu han el futur liug ils luvratoris d’eveniment per affons «pistregn, frina e paun» dil MRS.
Gion-Duri Gisler
Atgnamein sun jeu in da Turitg (Limmattal). Gia fetg baul hai jeu empriu d'enconuscher la Surselva e quei sco hosp da vacanzas, scolast e schuldau. La cultura, la historia mo era la bellezia cuntrada fascinescha mei bunamein 50 onns. Miu domizil ei ussa Flond. Las diversitads dallas stagiuns, las multifaras purschidas culturalas ein per mei in deletg. Suenter haver absolviu la scolaziun da menader da cultura hai jeu ussa il desideri da dar vinavon a scolars e scolaras mia savida e quei cun grond anim.
Ensemen cun ina collega havein creau il „Memory Tour“ in gir per affons tras il marcau da Glion. Jeu selegrel d'interessantas sentupadas e fetgel als participonts in cordial beinvegni.