MUSEUM REGIUNAL SURSELVA
 |
 |
|
MUSEUM REGIUNAL SURSELVA |
|
Haveis Vus a casa enqual caussa artada, curiositads ni in toc rimnau, che Vus saveis buca giudicar, sch'igl ei da valeta ni buc? Leis Vus udir il meini d'in expert? Nus selegrein sin biars visitaders da maneivel e dil lontan, sin objects interessants da tut gener, sin objects d'art e caussas nunenconuschentas. Vies object duei esser ina sfida per ils experts!
Lu vegni sonda, ils 25 da matg cun Vos scazis a Glion en Casa Cumin!
Naven dallas 9.30 uras entochen las 15.30 uras stattan suonadonts experts a Vossa disposiziun e dattan gratuit plaid e fatg.
Naven dallas 16.00 uras discuora Remo Arpagaus cun ils possessurs dils pli interessants objects dil di. Quell'occurrenza ei publica, vegn registrada dalla Televisiun Rumantscha ed emessa l'auter di. Mirei Cultura ni Climbim? dumengia, ils 26 da matg allas 17.25 uras els Cuntrasts sin SRF1!
Prezi: 7.-- frs. per carschi e 3.-- frs. per affon.
Flyer cun il program
Augustin Beeli ei expert per biblas, cudischs vegls, periodicas e resvistas.
Augustin Beeli ei bein enconuschents sco redactur abc dalla Quotidiana cun contribuzius interessantas sur dalla cultura e la historia dalla Surselva. Beeli ei scarvon dalla vischnaunca da Schluein, redactur tier l’anr e meina dasperas siu agen biro da text, la agenturabc.
Randolf Bonolini sefatschenta cun Vossas mobilias ed autras lavurs en lenn*)
Randolf Bonolini, scrinari d’antiquitads, meina la scrinaria d’antiquitads fundada da siu bab. Sia lavur principala ei la reconstrucziun da baghetgs vegls e la renovaziun da plantschius, tablegiaus, preits da quaders e portas. Ella stizun a Sagogn anflan ins denton era scaffas bein renovadas, meisas e truccas.
*) per mobilias grondas che pretendan in transport special, prendei si contact cun il Museum Regiunal Surselva gia avon 081 925 41 81.
Martin Schneider ei specialist per marcas postalas e filatelia, gravuras, graficas, cartas postalas, muneidas e marenghins, bancnotas, medaglias.
Martin Schneider posseda a Cuera ina stizun speciala ed ei bein stimaus tier rimnaders da marcas e cartas postalas. Cun sia experientscha da varga trent'onns, giudichescha el tocs ord rimnadas, ei menader d'exposiziuns, funcziuna sco juror e s'engascha sco funcziunari ell'uniun.
Emilio Zoppi giudichescha bischutaria e juvels.
Emilio Zoppi, bischutier, meina cun il medem num a Flem/Casa d'Uaul ensemen cun sia dunna Christiana e siu fegl Erio la fatschenta da Uras e bischutaria, e quei gia dapi 40 onns. El ei bischutier, gemmolog ed urer. En siu temps liber ei Emiilio Zoppi in alpinist passiunau.
Maurus Cathomas s'occupa da Vossas antiquitads, mobilias, stgellas, scalins, teppis.
Maurus Cathomas meina la Maurus Cathomas AG, ina vasta „manufactura da habitar“ cun in grond sortiment ed in’atgna pulstraria, sellaria ed atelier da cuser. Sia passiun ein denton las mobilias anticas, uaffens ed utensils sco era teppis da nomads ord igl Iran.
Gieri Darms giudichescha uras da tut las sorts.
Gieri Darms, urer, haveva gia duront sia scolaziun ina gronda passiun per uras anticas ed uras da sac. Oz reveda el en siu atelier uras mecanicas da tuttas specias a moda originala, aschia ch'ei tucca e fa tictac mellis gada el di ella "Casa dil temps antic" alla Via dalla Scola 46 a Glion.
Letizia Berther freut sich auf spannende Textilien, Kleider und Stoffe.
Letizia Berther restaurescha las varias textilias, paramenta ed objects dil Museum dalla Claustra da Mustér. Leutier s’auda era ina vasta collecziun da pézs e tarnettas da tuttas specias e differents materials. Entras questa incumbensa ha ella saviu sescolar intensivamein vinavon.
Leza Dosch fa siu mieni sur da maletgs, graficas, sculpturas, objects sacrals.
Leza Dosch, historicher d'art, posseda a Cuera in biro da historia d'art. El ei bein enconuschents sco autur da publicaziuns, guid da baghetgs da muntada historica e referendari cumpetent. Per nossa occcurrenza havein nus saviu engaschar el sco schazegiader d'art.
Remo Arpagaus, moderatur dall'occurrenza cun publicum, ei scenograf e musicist. El ha gia formau differentas exposiziuns per museums historics e sefatschenta era privat cun art ed antiquitads. Remo Arpagaus ei commember dalla suprastonza dall'uniun da fauturs dil MRS.
© 30.04.2025 Museum Regiunal Surselva
TEL ++41 81 925 41 81
info@museumregiunal.ch