Informaziuns generalas
Per gruppas e classas da scola (minimum 5 participonts) purschin nus sis differents luvratoris d'eveniment. Cumpiglau ein lavurs tradiziunalas ed artisanalas. Il plascher d'experimentar ed d'enconuscher ils materials stat en emprema lingia.
Lungatg: Tudestg e Romontsch
Mieds d'instrucziun:
Per tuttas purschidas stattan per ina preparaziun ad ina viseta mieds didactics d'instrucziun (en tudestg) a disposiziun. Las scolastas Nina Casanova, Patricia Cadruvi, Andrea Veraguth, Aurelia Bergamin ed Andrea Monn han elavurau per ils luvratoris d'experiments in mied d'instrucziun didactic en romontsch. Numnadamein il suandont: "Ils schuobacheclers", "Pistregn, frina e paun" e "Paun sur la burnida". Quella lavur ei in levgiament per nossa lavur da preparar ils "Workshops".
Prezis per 2-3 uras en ils luvratoris en il Museum Regiunal:
1-10 affons CHF 180.-
11-20 affons CHF 260.-
Prezi per 1/2 di el pistregn a Sagogn cun far paun e pizza:
Mo pusseivel las mesjamnas!
1-10 affons CHF 350.-
11-20 affons CHF 400.-
Pistregn, frina e paun
El renovau pistregn da Sagogn vegn il fuorn scaldaus cun lenna. Per far la pasta mettein nus frina, aua, sal e levon el briec. Mintgin prepara sia atgna pasta per far paun e pizza. Cun la menadra dil luvratori Petra Cavelti.
Mo pusseivel las masjamnas!
Liug: Pistregn ella cuort dalla pervenda catolica a Sagogn, colligiaziun d’autos da posta naven da Glion
Cuoz: ½ gi, normalmein naven dallas 9 entochen ca. las 13.30 uras
Adattau per:
Scoletta
Ciclus 1, 2 e 3
Dil fil alla teila
Dalla nuorsa, dalla elavuraziun dalla leuna e dil teisser setracta quei luvratori. Nus empruein il scarsinar e filar, luvrein al taler e fagein sez ina rama da teisser.
Liug: Museum Regiunal Surselva
Cuoz: 2 uras
Adattau per:
Scoletta
Ciclus 1
Far pischada e l'alpicultura
Co viva ina vacca cheu en ils cuolms ? Tgei maglia ella atgnamein e pertgei eis ella la stad ad alp ? En quei luvratori intervegnis vus dapli sur dalla veta da nossas vaccas e nus visitein la tegia d'alp originala dil museum. Il punct culminont ei da far l'atgna pischada e silsuenter degustar ella tier in bien apero. En mintga stagiun ina legra viseta. Cun la menadra dil luvratori Edith Albin.
Liug: Museum Regiunal Surselva
Cuoz: 2 uras
Adattau per: Ciclus 1 e 2
Ils "Schuobacheclers"
Il tema "Schuobacheclers" fatschenta affons, giuvenils ed era ils carschi. Daco vegnevan avon 150 onns affons da 7 onns tarmess lunsch naven per luvrar scho carschi ? Stuevan els buca ir a scola ? Cun tgei experientschas turnavan els a casa ? El luvratori "Schuobacheclers" sefantschentein cun quellas damondas. Cun las menadras dils luvratoris Edith Albin e Claudia Bosshard.
Luvratori per scalem mesaun:
Nus raquintein la historia da Gieri (12) ed Anna Maria (10) da Trun : Siu viadi el Schuob vegn interruts cun pintgas lavurs, p.ex. anflar la via a Ravenburg, eruir tenor ina gliesta l'identitad, la derivonza e la vegliadetgna dils affons, ni mirar era ei dapli mattatschas che buobs.
Luvratori per scalem superiur:
Il luvratori per il scalem superiur ha la medema structura sco il scalem mesaun. Las scolaras ed ils scolars tuornan a casa cun in portacletg ch'els san far sez ord crap scalegl.
Moduls supplementars "lavur d'affons e migraziun d'affons":
Supplementar purschein sin giavisch ina discussiun dil modul lavur d'affons tenor la Convenziun da dretgs d'affons dallas Naziuns Unidas sco era dil modul migraziun d'affons. Ina tematica actuala ch'occupescha giuven e vegl.
Ulteriuras informaziuns dil project internaziunal "Schwabenkinderweg": Download
Liug: Museum Regiunal Surselva
Cuoz: minimum 2 uras, luvratori cul modul supplementar minimum 3 uras
Adattau per:
Ciclus 3
Paun sur la burnida
Far sez paun ei buca striegn mo drova pacienzia e forza. El luvratori Paun sur la burnida entschevin cun ils garnins e calein cun schar guster in bien toc paun giud la burnida. Ils scoalrs e las scolaras lavuran sco pli baul. In eveniment che resta segir ditg en memoria.
Liug: Museum Regiunal Surselva
Cuoz: 2 uras
Adattau per:
Scoletta
Ciclus 1 e 2
