Memory Tour el marcau vegl
La Memory Tour ei ina palponta guida atras il marcau vegl da Glion. En gruppas retschercan ils scolar(a)s il passau dil marcau vegl. Ina purschida da mira!cultura per camps da vacanzas e classas da scola dil scalem miez (9-12 onns).
Datums tenor cunvegnientscha, cuoz 120 min., tel. +41 81 925 41 81 (museum) ni per Formular
Retrospectiva sin las occurrenzas 2016
Archiv ni pupi vegl? Experts giudicheschan vos documents vegls
Sonda, ils 29 d'october 2016, 9.30 - 16.00 uras cun bistro.
Mantenis Vus a casa vegls scartirams ni veglias brevs, che dat a Vus da lignar? Schaien tier Vus el surcombras scartiras da maun, cudischs da menaschi, correspondenzas, fotos, films ni porta tuns vegls, e saveis bu nua metter? Vegni a Glion e mussei Vos scazis als experts digl archiv cantunal e dalla biblioteca cantunala dil Grischun. Quels documents vegls savessan esser da gronda valur culturala.
Casa Cumin, CHF 8
RETROSPECTIVA sin il referat 1799 - in onn da sgarschur per la Surselva ed il Grischun
Mardis, ils 3 da matg, allas 20.00 uras
Da 1799 tochen 1802, duront l’uiara da coaliziun, stuevan las vischnauncas dalla Surselva dar, bugen ni nuidis, quatier alternativamein a truppas franzosas ed austriacas. Ils 3 da matg 1799 ei la milissa territoriala sursilvana, il landsturm, semessa el cumbat sper Reichenau/La Punt, cun ina tecnica da far uiara munglusa encunter l’armada franzosa. Gaudenz Schmid da Cuera raquenta en siu referat dils motivs da quei drama.
RETROSPECTIVA: Il Meister da Vuorz alla tablada
 |
Sonda, 3 da settember, allas 14.00 uras
Blanche Keeris ei commembra dil Comthurey alpinum, ina societad che sestenta da presentar a moda viva ina gruppa da viandonts dil temps medieval. 2010 ha la gruppa Comthury alpinum giu siu camp d’atun sil Munt s. Gieri. Sco cuschiniera sa Blanche Keeris tgei spisas che vegnevan messas sin meisa dil temps dil Meister da Vuorz ed en in referat dat ella investa en las manieras da meisa dil temps miez, ed ella presenta rezepts e culinaricas specialas.
Casa cumin Glion, 7 frs.
Maletgs dil referat "1799 - In onn da sgarschur per la Surselva ed il Grischun" dils 3 da matg 2016
RETROSPECTIVA sin il luvratori da sprayar cun Mathias Durisch
Sonda, ils 9 d'avrel, 9-17 uras
Tgei giavischs pil futur han ils giuvenils da Glion e contuorn? Il Museum Regiunal Surselva e la lavur da giuvenils Glion han purschiu ina plattforma speciala per exprimer tals giavischs: in luvratori da sprayar.
Rapports da pressa, maletgs ed in video dil luvratori da sprayar d'ils 9 d'avrel 2016
Art or dal vapurisader – in workshop da sprayar per giuvenils - mirar ils video
RETROSPECTIVA sin il concert "Der Sonnen Glanz" - musica dil temps medieval e dalla renaschientscha
Gievgia, ils 25 da fevrer 2016 en la baselgia da Vuorz, 20 uras
La baselgia da Vuorz cun ses frescos enconuschents ha purschiu idealas cundiziuns per la musica dil duo "Mittelalter-Spiellüt". Cordial engraziament a Jonathan Frey ed Jeannine Gloor per quella biala e divertenta sera d'unviern!
Maletgs ed in video dil concert
RETROSPECTIVA: excursiun silla ruina dil casti da Frundsberg
Sin viseta tier Heinrich da Frauenberg: sonda, ils 10 d’october, 14–16 uras
Da ballezia aura d'atun ein entuorn 25 persunas vegnidas a Ruschein per viagiar communablamein si tier la ruina dil casti da Frundsberg (Frauenberg), situada sin in crest el sidvest dil vitg. La dimensiun dil stabiliment punctuescha l’impurtonza dalla dimora dils da Frauenberg. Suenter l'inspecziun dalla miraglia imposante e las explicaziuns da Gion Mathias Cadruvi e Rosmarie Bartholet dalla Fundaziun Ruina da Frundsberg accumpignau dat in bien aperitiv eis ei puspei iu a Ruschein. Ell'ustria Alpina ha Markus Burgmeier (Balzers) referiu sur d'il castellan Heinrich da Frauenbergcavalier sco cavalier da turnier e trubadur. Duront il referat han ils affons astgau sittar sut provediment professiunal da Marius Hublard e Jürg Hassler paliet ed artg. In di plein sulegl e surpresas per grond e pign.
L'excursiun ei vegnida organisada dil Museum Regiunal Surselva en collavuraziun cun la fundaziun Ruina da Frundsberg
Maletgs dall'excursion "Sin viseta tier Heinrich da Frauenberg" ils 10 d'october 2015
RETROSPECTIVA: Prelecziun "La stria da Dentervals"
 |
 |
 |
 |
Margis, ils 15 da settember, 20–21.30 uras
Entuorn 20 audituras ed auditurs han enflau la via en la Sala terena dil museum quella sera plein brentina ella val. "Brentina ella val", aschia entscheiva il roman «La stria da Dentervals» da Hubert Giger. Era sch'ei setracta dat in roman, se basa el sin fatgs bein rescherschai. Denter 1590 e 1732 ein 300 persunas vegni accusai en Surselva pervia da striegn e silmeins 120 scavazzadas. Era el cumin da Glion/Foppa han denter 1650 e 1700 giu liug process encunter strias. Il roman "La stria da Dentervals" meina anavos egl onn 1674, nua che la dertgira criminala da Mustér enquera ina culponta per eveniments inquietonts succedi ella vischnaunca. Engraziel zun fetg Hubert Giger e Jano Felice Pajarola per quella prelecziun consistenta plein tensiu.
Tgi che ha munchentau sa mirar sutvart las fotografias dalla prelecziun.
Maletgs dalla prelecziun "La stria da Dentervals" dils 15.9.2015
