Digl individi alla cuminonza

 

Niev luvratori, 4. entochen 7. classa tier l’exposiziun speciala actuala « Cumin e cuminonza”

En l’exposiziun speciala actuala “13 x Ilanz/Glion. Cumin e cuminonza” dil Museum Regiunal Surselva semova tut entuorn la convivenza: Co funcziuna cuminonza? Tgei drova ei per ina cuminonza pascheivla? Tgi contribuescha tgei? El luvratori da scola emprendan las scolaras ed ils scolars enzatgei davart la naschientscha ed il svilup d’ina vischnaunca e davart la cuminonza en Surselva e fan tests practics per la convivenza en lur classa. Els vegnan activs e laian anavos fastitgs ell’exposiziun, enriheschan quella ed emprendan enzatgei per en scola.

 

Il luvratori ei adattaus naven dalla 4. classa e cuozza 90 minutas. Enconuschientschas preliminaras ein buca necessarias.

 

Cuosts:
1-10 affons frs. 180.--

11-20 affons frs.  260.--

 

Prezis per classas da scola da Ilanz/Glion:

1-10 affons frs. 120.--

11-20 affons frs. 200.--

 

Visetas culturalas/spesas da viadi

Il cantun promova e sustegn visetas culturalas da classas da scola. Ulteriuras informaziuns anfleis Vus sin la pagina dalla promoziun cantunala da cultura.

 

Cheu anfleis Vus il formular d’annunzia e da consentiment.

 

 

Beinvegni a casa! Il retuorn a casa dalla porta baselgia da S. Margretha.

 

Circa 430 onns ha la porta baselgia che deriva ord il temps da construcziun dalla baselgia da S. Margretha a Glion fatg frund a vent ed aura. Igl onn 1928 eis ella vegnida remplazzada ed ei svanida senza fastitgs. Ussa ei il toc antic puspei cumparius e turnaus anavos ella baselgia da S. Margretha. Leu survegn ella in plaz d’honur el chor.

 

Che quei daventi pusseivel ei d’attribuir ad in project dalla pleiv evangelica refurmada da Glion ensemen cul Museum Regiunal Surselva. Gia han uniuns e fundaziuns engaschadas dau contribuziuns per la cumpra e per l’exposiziun cumpetenta dalla porta baselgia. Era il maun public gida a realisar quei project. Aunc mauncan bunamein 15’000 francs sil conto da project per ch’el possi reussir. Cun forzas unidas duess ei esser pusseivel. Gidei era Vus da schar turnar a casa quella perdetga dalla veta eclesiastica da Glion da passsa quatertschien onns.

 

Cheu anfleis Vus igl appel da donaziuns, ina inforamziun cuorta ed in dossier da fundraising. Nus esann ventireivels per mintga summa. Tut las donaziuns vegnan menziunadas sin ina tabla en baselgia. Contribuziuns da 1000.— francs e dapli ch’ein vegnidas regaladas entochen igl 1. d’october vegnan menziunadas ella broschura d’accumpignameint.

 

Appel da donaziuns

Informaziun cuorta e scret da pagament

Dossier da fundraising

 

 

 

 

Ina nova exposiziun permanenta pil Museum Regiunal Surselva

 

Duront ils davos 15 onns ha la fundaziun Museum Regiunal Surselva investau bia en la cumplettaziun, en l’analisa scientifica ed en la digitalisaziun digl inventari. Igl onn 2013 han ins saviu realisar in deposit (arcun da cultura) aposta pils objects dil museum. Medemamein ei la Casa Carniec vegnida renovada e modernisada. In ascensur colligia oz las alzadas dil museum cun rodund 900 m2 surfatscha da diever.

 

Sco davos pass duei uss l’exposiziun permanenta vegnida modernisada e surluvrada tematicamein da funs ensi. Per contonscher in concept da realisaziun consolidau han ins elaborau en in emprem pass in muossavia pil museum futur. Quei muossavia ei seresultaus ord in stretg brat denter il cussegl da fundaziun ed il team dil museum e cumpeglia sper in’analisa da SWOT, ina strategia (visiun, missiun, finamira e mesiras concretas) sco era in’emprema messa davart ils temas, il narrativ e davart il diever dallas localitads.

 

Actualmein sesanfla il project en la fasa da finanziaziun. Igl MRS enquera donaturAs e sponsurAs per realisar l’exposiziun. Cheu anfleis Vus ulteriuras Informaziuns davart la concepziun:

 

 

Broschura da fundraising

Concept da realisaziun

 

Indicaziuns da banca: 

Graubündner Kantonalbank

Stiftung Museum Regiunal Surselva

Städtlistrasse 10, 7130 Ilanz

IBAN CH03 0077 4110 2316 0560 0

 

 

Directiva per l’exposiziun futura 

Las cundiziuns da rama ord il muossavia strategic san ins ressumar sco suonda:

• ·        Igl MRS secolligia cun la Casa Carniec e cun in museum tenor ICOM cun collecziun, cun exposiziuns permanentas e temporaras sco era cun in program d’intermediaziun.

 

• ·        La nov’exposiziun permanenta suonda in narrativ surordinau e corrispunda a pretensiuns severas da scenografia ed intermediaziun.

 

• ·        La nov’exposiziun permanenta ei palpabla cun tut ils senns. Ella cuntegn oravontut elements che pretendan ina participaziun activa.

 

• ·        Tecnica mediala vegn buca duvrada sco atgna finamira denton mo precautamein leu, nua ch’ella porta in clara plivalur.

 

 

• ·        Cuntegns digitalisai vegnan elaborai aschia ch’els san medemamein vegnir publicai egl internet.

 

 

• ·        In “Fastitg da famiglia” sco purschida d’intermediaziun durabla meina atras tut las localitads ed ils temas dall’exposiziun permanenta.

 

 

• ·        L’exposiziun permanenta vegn engrondida tematicamein sco era temporalmein e sefocussescha el medem mument pli ferm sin la Surselva.

 

 

• ·        La nov’exposiziun permanenta focussescha sin cuntegns relevants cun caracter exclusiv ella cuntrada da museums Grischuna.

 

 

• ·        Objects fuorman il coc dall’exposiziun permamenta.

 

 

• ·        La bilinguitad sco segn caracteristic central dalla Surselva ei medemamein representada ell’exposiziun. Tut ils cuntegns vegnan consequentamein intermediai en dus lungatgs.

Public giavischau

Igl MRS vul esser in liug d’inscunter per tut las gruppas dalla populaziun ord la Surselva e d’ordeifer. Sco public giavischau ein ils hosps da vacanzas pia plidentai ton sco ils indigens. Famiglias ton sco scolas e persunas interessadas alla cultura. Per ademplir quella gronda pretensiun porscha l’exposiziun futura elements specifics pils differents publics. L’exposiziun planisada cuntegn dapli elements activs e duei esser ton sco pusseivel inclusiva e senza barrieras.

 

 

 

Exposiziun speciala "13 x Ilanz/Glion. Cumin e cuminonza"
1 da zercladur 2024 – 31 da mars 2025

 

Vernissascha per ils hosps envidai ils 31 da matg 2024, allas 19.00

 

Fotografias Lucia Degonda ı Jaromir Kreiliger

 

L'autonomia communala ha ina gronda impurtonza el Grischun. En vesta al svilup communal historic en il cantun ed en Surselva s’occupescha l' exposiziun speciala el Museum Regiunal Surselva cun la vischnaunca da Ilanz/Glion, ch'exista dapi gl’onn 2014, sedamonda davart la fuorma dalla convivenza ella politica ed ella societad dad oz.

 

En numerus purtrets e biaras intervestas vegnan persunas or dalla vischnaunca a plaid e las visitadras ed ils visitaders pon exprimer sezs lur opiniun davart temas sco la participaziun politica, la formaziun d' opiniuns, la convivenza ed igl engaschament.

 

 

Curatur hospitont Bruno Meier, scenograf Remo Arpagaus