MUSEUM REGIUNAL SURSELVA: actual

Uras d’avertura:

Naven dils 1 d’avrel entochen ils 20 da zercladur 2026 resta il Museum Regiunal Surselva serraus.

Vernissascha dalla nova exposiziun permanenta «tipic Surselva», dumengia ils 21 da zercladur 2026.
Nus arvin il Museum e la nova exposiziun permanenta cun ina gronda fiasta per pign e grond. Las informaziuns suondan pli tard.

Prolungaziun dalla exposiziun speciala «Wir Frauen – Nus fagein e basta!»:
L’exposiziun speciala «Wir Frauen – Nus fagein e basta!» vegn prolungida ed ei aviarta naven dils 21 da zercladur entochen ils 01 da november 2026. La Memory Tour per classas da scola el Städtli da Glion e visetas guidadas atras l’exposiziun speciala fagein nus sin damonda era ordeifer las uras d’avertura. Annunzias sin info@museumregiunal.ch

BARgia il davos venderdis dil meins:
La bar dil Museum ei aviarta mintgamai il davos venderdis dil meins naven dallas 18.00.

Nova exposiziun speciala:

Wir Frauen - nus fagein e basta!

L’exposiziun speciala vegn prolungida ed ei aviarta naven dils 21 da zercladur entochen ils 01 da november 2026.

Per il giubileum da 50 onns Uniun da dunnas Sevgein fan l’uniun ed il Museum Regiunal Surselva communablamein in’exposiziun che sededichescha alla historia dall’uniun – ed aschia allas dunnas savens survesidas en nossa vallada.

L’exposiziun muossa quei ch’ei meinsvart nunveseivel – e suonda ils ﬁls dalla historia feminina enteifer il mintgadi. Ella secolligia cun dunnas che fan politica, lavuran voluntariamein, sescoleschan, educheschan, dattan vinavon tradiziuns e cultura – e sedamonda era: Da tgei ponn ein las heroxas dil mintgadi insumma fatgas?

Uniun purtadra: Uniun da dunnas Sevgein

Curatori: Yvonne Gienal, Tabea Ammann

Program accumpignont e guidas publicas: museumregiunal.ch

flyer

-(neues Fenster öffnet Foto in Originalgrösse)

Ina nova exposiziun permanenta pil Museum Regiunal Surselva

Duront ils davos 15 onns ha la fundaziun Museum Regiunal Surselva investau bia en la cumplettaziun, en l’analisa scientifica ed en la digitalisaziun digl inventari. Igl onn 2013 han ins saviu realisar in deposit (arcun da cultura) aposta pils objects dil museum. Medemamein ei la Casa Carniec vegnida renovada e modernisada. In ascensur colligia oz las alzadas dil museum cun rodund 900 m2 surfatscha da diever.

Sco davos pass duei uss l’exposiziun permanenta vegnida modernisada e surluvrada tematicamein da funs ensi. Per contonscher in concept da realisaziun consolidau han ins elaborau en in emprem pass in muossavia pil museum futur. Quei muossavia ei seresultaus ord in stretg brat denter il cussegl da fundaziun ed il team dil museum e cumpeglia sper in’analisa da SWOT, ina strategia (visiun, missiun, finamira e mesiras concretas) sco era in’emprema messa davart ils temas, il narrativ e davart il diever dallas localitads.

Actualmein sesanfla il project en la fasa da finanziaziun. Igl MRS enquera donaturAs e sponsurAs per realisar l’exposiziun. Cheu anfleis Vus ulteriuras Informaziuns davart la concepziun:

Broschura da fundraising

Concept da realisaziun

Indicaziuns da banca:

Graubündner Kantonalbank

Stiftung Museum Regiunal Surselva

Städtlistrasse 10, 7130 Ilanz

IBAN CH03 0077 4110 2316 0560 0