MUSEUM REGIUNAL SURSELVA

Beinvegni el Museum Regiunal Surselva!

Il Museum Regiunal Surselva porscha als visitaders ina retrospectiva dalla veta economica avon l'entschatta dall'industria. Quella veta era determinada sin l'economia d'in mistregn, dall'agricultura e dil tenercasa. L'exposiziun permanenta en la Casa Carniec muossa sin siat alzadas co la glieud da gliez temps sedustavan per ina existenza e co els s'organisavan en famiglia ed en vischnaunca.

Special vid l’exposiziun dil MRS ein ils luvratoris artisanals, p.ex. la serraria Albin, la fravgia d'irom da Pieder Arpagaus, il luvratori da calger da Georg Tschuor ni era parts dallas fravgias da Flurin Monn e Sep Casutt. Ils luvratoris ein vegni dislocai dil liug d'origin ed installai el MRS. Ulteriuramein illustrescha ina elecziun da varga 100 films l'exposiziun.

Nus intermediein cun passiun!  S’informei davart nossas differentas purschidas, luvratoris, excursiuns ed arranschaments en ed ordeifer nossa casa. In tut special beinvegni als affons!

In’ierta culturala davos mirs historics     

Gia mo il baghetg, la Casa Carniec, ei fetg interessants ed imposants. Quella casa patriziana ei la pli veglia residenza dalla famiglia aristrocata Schmid von Grüneck. Ils arviuls el tschaler ed el plaunterren derivan dil temps medieval classic. Ina stanza ei ornada cun pictura murala ord il temps dalla renaschientscha. En quella stanza fagevan ils Schmid von Grüneck lur fiastas e discurrevan sur d'impurtontas fatschentas.

Igl onn 1980 ha ina fundaziun cumprau la Casa Carniec. La casa ei vegnida restaurada ed igl onn 1988 han ins arviert las portas dil niev museum. L'exposiziun consista ord curonta parts e temas da mintga vallada dalla Surselva. Quei territori cumpeglia differentas cuminonzas da lungatg: ils Romontschs, ils Tudestgs ed ils Gualsers. Ord mintga regiun anfl'ins in ni l'auter object.

La collecziun

La collecziun dil museum cumpeglia oz rodund 11'000 objects che vegnan mussai permanent en l'exposiziun. Autras parts dalla collecziun ein vegnidas deponidas en la localitad da schurmetg per beins culturals cun ina constanta temperatura e humiditad. Quei edifeci ei vegnius baghegiaus 2013 e sesanfla en la Via Surselva a Glion.

La collecziun sebasa sin documentaziuns digl agen archiv e dalla biblioteca cun literatura  da perscrutaziun. Per perscrutaders/ras interessai stat quella documentaziun a disposiziun (negin emprest).

Nova collecziun da ceramica accessibla

Entochen tier l'avertura veis vus la pusseivladad da dar in'egliada sin nossa collecziun da ceramica.

Dr. Andreas Heege, che ha sin incumbensa dalla fundaziun CERAMICA Svizzra elaborau in inventari dalla vischala da ceramica, ei staus la stad vargada tier nus. La collecziun da ceramica dil MRS ei ussa sin la pagina d'internet dalla fundaziun CERAMICA.

 

Cheu ei la valetaziun dil posses da ceramica dil MRS: CERAMICA-Museen

 

e cheu tier singuls objects: CERAMICA-Datenbank