Uras d'avertura
Il Museum ei aviarts mintgamai mardis entochen dumengia naven dallas 14:00 entochen las 17:00.
Guidas, luvratoris per affons e visetas da classas da scola purschin nus sin damonda bugen era ordeifer il temps d'avertura.
PROXIMAS OCCURRENZAS:
Festival dad Oldtimers e vernissascha dalla exposiziun speciala "AutoGR100. Mobil atras la Surselva"
Dumengia, ils 15 da zercladur 2025
Pil giubileum da 100 onns automobil el cantun Grischun muossa il Museum Regiunal Surselva l’exposiziun «Auto GR100 — Mobil atras la Surselva» ella garascha Stefan Fontana che ha ina muntada historica per Glion. Pér dapi tschien onns eisi lubiu da carrar cun auto el Grischun. Il traffic motorisau ha caschunau grondas midadas ella societad ed ella cuntrada. L’exposiziun muossa quellas midadas en Surselva cun numerusas fotografias ord archivs privat.
A caschun dalla vernissascha semida il marcau vegl da Glion entuorn la plazza Cumin, en collaboraziun cul Oldtimerland Graubünden, en in festival dad Oldtimers da gener special. Ils visitaders e las visitadras ein cordialmein envidai d’admirar quei bein cultural automobil. Il suentermiezdi dat ei la pussseivladad da far in cuort gir sco passagier cun in da quels autos.
Program surprendent:
9.00 Avertura ed entrada dils oldtimers el marcau vegl da Glion
11.00 Vernissascha dalla nova exposiziun "AutoGR100. Mobil atras la Surselva"
Garascha Stefan Fontana, Plazza Cumin 12, 7130 Glion
15.00 Cuort gir per ils visitaders cun ils Oldtimers.
Ei ha tons plaz sco ei ha....
16.00 Finiziun dall’occurrenza.
Per il beinstar corporal ei procurau.
PROLUNGAZIUN DALLA EXPOSIZIUN SPECIALA ENTOCHEN FIN FENADUR 2025
"13 x Ilanz/Glion. Cumin e cuminonza" cun novs portrets da burgheis e burgheisas dalla vischnaunca da Ilanz/Glion.
Fotografias Lucia Degonda ı Jaromir Kreiliger
L'autonomia communala ha ina gronda impurtonza el Grischun. En vesta al svilup communal historic en il cantun ed en Surselva s’occupescha l' exposiziun speciala el Museum Regiunal Surselva cun la vischnaunca da Ilanz/Glion, ch'exista dapi gl’onn 2014, sedamonda davart la fuorma dalla convivenza ella politica ed ella societad dad oz.
En numerus purtrets e biaras intervestas vegnan persunas or dalla vischnaunca a plaid e las visitadras ed ils visitaders pon exprimer sezs lur opiniun davart temas sco la participaziun politica, la formaziun d' opiniuns, la convivenza ed igl engaschament.
Curatur hospitont Bruno Meier, scenograf Remo Arpagaus
Digl individi alla cuminonza
Niev luvratori, 4. entochen 7. classa tier l’exposiziun speciala actuala « Cumin e cuminonza”
En l’exposiziun speciala actuala “13 x Ilanz/Glion. Cumin e cuminonza” dil Museum Regiunal Surselva semova tut entuorn la convivenza: Co funcziuna cuminonza? Tgei drova ei per ina cuminonza pascheivla? Tgi contribuescha tgei? El luvratori da scola emprendan las scolaras ed ils scolars enzatgei davart la naschientscha ed il svilup d’ina vischnaunca e davart la cuminonza en Surselva e fan tests practics per la convivenza en lur classa. Els vegnan activs e laian anavos fastitgs ell’exposiziun, enriheschan quella ed emprendan enzatgei per en scola.
Il luvratori ei adattaus naven dalla 4. classa e cuozza 90 minutas. Enconuschientschas preliminaras ein buca necessarias.
Cuosts:
1-10 affons frs. 180.--
11-20 affons frs. 260.--
Prezis per classas da scola da Ilanz/Glion:
1-10 affons frs. 120.--
11-20 affons frs. 200.--
Visetas culturalas/spesas da viadi
Il cantun promova e sustegn visetas culturalas da classas da scola. Ulteriuras informaziuns anfleis Vus sin la pagina dalla promoziun cantunala da cultura.
Cheu anfleis Vus il formular d’annunzia e da consentiment.
Ina nova exposiziun permanenta pil Museum Regiunal Surselva
Duront ils davos 15 onns ha la fundaziun Museum Regiunal Surselva investau bia en la cumplettaziun, en l’analisa scientifica ed en la digitalisaziun digl inventari. Igl onn 2013 han ins saviu realisar in deposit (arcun da cultura) aposta pils objects dil museum. Medemamein ei la Casa Carniec vegnida renovada e modernisada. In ascensur colligia oz las alzadas dil museum cun rodund 900 m2 surfatscha da diever.
Sco davos pass duei uss l’exposiziun permanenta vegnida modernisada e surluvrada tematicamein da funs ensi. Per contonscher in concept da realisaziun consolidau han ins elaborau en in emprem pass in muossavia pil museum futur. Quei muossavia ei seresultaus ord in stretg brat denter il cussegl da fundaziun ed il team dil museum e cumpeglia sper in’analisa da SWOT, ina strategia (visiun, missiun, finamira e mesiras concretas) sco era in’emprema messa davart ils temas, il narrativ e davart il diever dallas localitads.
Actualmein sesanfla il project en la fasa da finanziaziun. Igl MRS enquera donaturAs e sponsurAs per realisar l’exposiziun. Cheu anfleis Vus ulteriuras Informaziuns davart la concepziun:
Indicaziuns da banca:
Graubündner Kantonalbank
Stiftung Museum Regiunal Surselva
Städtlistrasse 10, 7130 Ilanz
IBAN CH03 0077 4110 2316 0560 0
